«ММК колдоо борбору» фонду «BRYCA» долбоорунун алкагында, Кыргызстандагы мектеп мугалимдери, атайын орто жана жогорку окуу жайларынын окутуучулары, ошондой эле дагы башка тармактын өкүлдөрү үчүн 2 күндүк медиа жана маалыматтык сабаттуулук боюнча семинар-тренинг өткөрөт.

 Уюштуруучулардын айтуусу боюнча, аталган долбоордун негизги максаты – медиа маалыматтык сабаттуулукту жайылтуу, маалыматтык доордо жаңы кыйынчылыктарга туруштук берүү, ошондой эле өз багытындагы медиа сабаттуулугун окутуу жаатында кесиптик билимин кеңейтүү, бул жааттагы долбоорлорду уюштуруучуларга көмөк көрсөтүү.

 «Жаштар менен иштөөдөгү медиа жана маалыматтык сабаттуулук» деп аталган эки күндүк семинар-тренинг 2021-жылдын 3-4-апрелинде Жалал-Абад шаарында, 5-6-апрелде Кызыл-Кыя шаарында, 8-13-апрелде (3 топ үчүн) Ош шаарында, ошондой эле 17-18-апрелде Каракол шаарында уюштурулмакчы.

 Эске сала кетсек, катышуучуларды аныктоону «ММК колдоо борбору» фонду конкурстук негизде жүргүзүп, өлкө боюнча жалпы 120 катышуучу тандалып алынган. Тандоо учурунда, катышуучунун өз багыты боюнча медиа жана маалыматтык сабаттуулукту андан ары өнүктүрүүгө жана өз жамааттары үчүн санариптик жана медиа сабаттуулугу боюнча окутуу жана башка иш-чараларды уюштурууга даярдыгы бааланган.